ثقافة

مشتاقة ” أميره البنا _ مصر

اميرة البنا

مشتاقة اكتب لك يا حبيبي جواب
ويكون من اكتر من صفحة
مش هبعت بوست او واتس آب
انا هبعت اشواقي الحارة

فهكتب لك كل احساسي
و اهمس لك جوه كراسي
بكل السر و الحيرة
ازاي انا دايبة في بحر الشوق
ودايبة كمان من الغيرة
مع اني عارفة اخلاصك
لكن بعدك مجنني
سعات اكدب احساسك
وسعات عقلي يروح مني
لكن قلبي عشان عاشقك
احساسه بيك يطمني

ونفس كمان ابعت مراسيل
شايلن من قلبي ليك سلامات
واقولك فيها البعد بخيل
وخلا القلب ف عذابه يبات
وليل البعد طويل وتقيل
بحس بدق القلب ده مات

وهتخانق واعمل موضوع
و وازعق واعمل حكايات
ساعتها كمان قلبي الموجوع
هيصَحي معاك البدايات

واستني الرد على ناري
بجواب يغير افكاري
واغيب عن وعيي لما اقرا
حروفك تضوي انواري

اخد جوابك في احضاني
وانسى همي واحزاني
واشم ريحتك ف الورق
ترد فيا الروح تاني

وارجع تاني ارد عليك
واحكي لك عن الأحزان
وان الدنيا من غيرك
ما فيش فيها بجد امان
وعن شوقي لحضن عنيك
وعن خوفي حبيبي عليك
ويمكن ساعتها القلم يكتب
عن دمعي وبداري عليك
او جايز تحس دموعي
لما تقرا الورق ف ايديك

عن الايام ووحشتها
عن الوحده وشدتها
عن روحي وغربتها
وحلم رجوعك م الغربة
بتقولي بجد وحشتيني
يا ساكنه العين مع النني
يا هنايا وفرحي وحنيني
وهمي وجرحي وانيني
وحق من خلا انفاسك
ساكنه قلبي و وتيني
انا عايش كما الأموات
وحضنك بس يحييني