عارف يعني ايه احساس ” للشاعرة : منى الشيخ _ مصر

عارف يعني ايه احساس
يجيبك من غياب الناس
يخليك فوق مشاع الشوق
ينسيك اي يأس اتعاش ..

ماشيه الطريق والله مش شايفه
بخطاك و حسك…… باحسك بس بالعافيه
مسجونه ف مشاعر رايحه ..ملعونه الحدود القاسيه

اسمي المعاني بتتنسي مع كل بعد و جفا
انت اللي بيك بانتهي وانت اللي بيك باحيا

يا مفكرين الضحكه سهله و ممكنه
حضنه الوحيد اللي احتواني ..
.. مش هنا

و غصب عني مضطره اغني
و ابقي الاماني الممكنه

اكتب كلام عن المكان و الخوف زمان و المعجزه
الاقيه ف سري و روحي تجري و انسي حيرتي المزمنه

فايتني اقول ان العقول ضحله ..و القلوب متحجره
و العقد مش عهد اتكتب … الكلمه باقيه و مخلصه

يادي المشاعر لما تبقي بجد صدق
يادي الحاجات اللي بتحصل من قلوب بترق

ابدأ منين و انا واصله عندك م الطريق الصعب
مسافات تشيلني تحطني .. مابقولش الا يا رب

انت السبب و العجب و المكسب المحتمل
وانت اللي بيك باحتمي …من خزي لم يكتمل

اعذر مخاوفي و وضوحي
انا شفت ويل و جنون

معجون بقلبي الشغف
طول مانت فيه مكسون

معجون بقلبي الشغف
طول مانت فيه مسكون

admin

See author's posts