24 يونيو، 2024

اسرح ” للشاعرة : نجلاء عزت _ مصر

نجلاء عزت

كنت لما أحب اقابله
..بس اغمض عينى واسرح
كنت بأفرح
.كنت امشى وأجرى وأمرح
كانت الدنيا فى عينى
..كلها لهوايه مطرح
كنت اضم إيديّا
فى إيديّا الوحيدة
كنت أحس الدنيا
فرحانة وسعيدة
مهما كان الحلم ..حلم
والّا شمس عينيه بعيدة
مهما كان فى الحب ظلم
والّا حيرة ونار جديدة
قلبي نام فى هواه وضم
دنيته الحلوة الفريدة
كنت لما اشتاق إليه
اكتب الأشواق أغانى
واختلى بنفسى المحبة
وارتمى ف العشق تانى
واترك الأوهام تخدنى
وانسى فين نفسى ومكانى
والفراغ بيدفى حضنى
والحقيقة مقيدانى
فجأة تانى عقلى يصحى
والقى نفسى مرجعانى
وافتكر إنّى وحيدة
وافتكر من إيه بعانى
بس برضه برجع احلم
حضرتك لو يوم مكانى
مش هتحلم برضه زى
نملك إيه غير الأمانى