وغيرت عليك ” للشاعرة: هبة صلاح _ مصر

وغيرت عليك!!
ودوبت كتير من الغيرة
ولا مرة…
قدرت أقبل
يكون لي شريك
وتسكني أوام حيرة
لو ألمح مرة تسبيلة
في عين واحدة
تشوفها عينيك
بكون هتجن!!!
وبسأل نفسي
ألف سؤال
لكن في الحال
تحس بحيرتي
وتقولي ( و ليه الظن؟! )

لكن برجع وأغير تاني
و بلقاني…
في حبك قلبي ده أناني
ومش عايزك تحس بحد
ولو حسيت كمان بالبرد
أغير منه…
وم النسمة
وغيرت عليك من الهمسة
وم نفسك
ومن قمرك و من شمسك
ومن ليلك
ومن شعرك ومواويلك
و يااااااه…..
لو أكون أنا نفسك!!!!
هغير برضو عليك مني
وغصبن عني مش هقدر
في قلبك يوم
يكون لي شريك
فطمني
وعلمني
أكون أقوى…
في غيرتي عليك!!!

admin

See author's posts