“البحر ليه مالح” للشاعرة : سوسن رمضان _ مصر

البحر ليه مالح ؟؟

بتبان علي وشي
ملامح بحرِك الرايق
ترسمني ضحكايه..
وساعات كتير بتبان
أحلامي ف ملامحِك
والعشق ده حكايه ..
مركب ورق بتغني للنسمة
ترقص ف حضن القمر
تغمز لها النجمة
فيحن قلب القدر
ونغني للغربة
موال تعب م السفر ..
تفاصيلي تدهشني
أتوه والقاني
والحزن يملاني ..
والمد يحدفني ع الشط من تاني
ف الموج يوشوشني..
(العشق منجاة للحزانه
والروح ف قلب الروح أمانة )
يأس القلوب كافر ..
واللي يخونه الزمن
الحب ِليه ساتر
من غير ما يدفع تمن ..احزانه بتسافر
……و البحر ليه مالح ؟؟!!
وعيون سماه زرقا ..
من دمعتي ف قلبه
والا من الفرقه ؟

admin

See author's posts