“ضيعانك يا وطن” للقاصة : عبير شعبان _ سوريا

يا ضيعانك يا وطن
يا ضيعان صباك ، و وجهك هالحلو ، يا ضيعان تيابك الخضرا ، أديش تعبت و تعبت ومرّ عليها وقت وانت تطرزها و تنبت بعيونها الحبقة والزيتونة والنبعة …
حرقوك .. الله لا يوفقن ، قولوا آمين ،
حرقو بسمة عيونك وحكايات رمانك و فساتين عرس ناطرة يطلع عليها الضو
حرقوك.. وسرقو لقمة عيشنا و أحلامنا و مواسم حب و بسمات ولادنا
حرقوك و حرقو قلبي و شجرة زرعتها انا وبيي
الله يلعنن ويلعن كل الأيادي المجرمة الحاقدة اللي حرقت ساحلنا وجبالنا وزيتونا ،
هالحرائق أبداً مو قضاء وقدر ومستحيل تكون هيك ، هيي متعمدة و مخطط إلها بكل تقنية وخاصة عنا بالساحل ..
الله ينتقم منن و يصبرنا ويعوضنا ع كل شي ضاع منّا يا رب .

وشو ضل بعد يا وطن …؟!

admin

See author's posts