” سؤال مطروح ” للشاعرة : شرين الدماطى _ مصر

سؤال مطروح

مابين السطر والتانى سطور بالكوم
وسال الوجع فيا كما دموعى
حزينة إنتى يا بهية على جوعى ؟
ووجع ع الرصيف نايم ف عز البرد
وبنرَوح ونتخبى ف جدرانا
كأن ماشفنا يوم حاجة
قلوبنا أصبحت غابة
ومليانة طيور جارحة
وبعد الحب وطيابة
بقينا بنحسد الفرحة
وانا وإنتى ف نفس السطر
إسمك يبتدى العنوان
وترمينى لآخر سطر
وف البين كلام موزون
مهوش فاعل
كلام يتقال وبيغافل
واللاقى نفسي مابين كلمة ومعكوسها
منيش فاعل
أنا ببصم على خطك
وبتلقف كلام منك
منيش فاهمة
حلاوتك مررت حلقي
تملى القصة وياكى
بدايتها بصوت مخنوق
وانا اللى حاسس المعنى
عشيقة وأنا المعشوق
عشقتينى أموت ف ترابك
عشقتينى حارس على بابك
عشقتينى مفيش فى عشقنا إنصاف
أنا أحميكى عشان قلبي عليكى يخاف
وعشقك ليا مصلحتك
وانا راضي
ولا أحكم عليكى ف يوم
منيش قاضى
سطورك كلها صعبة
كما المشى على الأشواك
جناين حُبنا مزروعة
وبنجيب حُبنا من بره
وجعنا ع الدوا متلطم
عشان غلبان ملوش ديه
ومع فيض الوجع فيا
تعودى إنتى كا حبيبة
غريبة إنتى ومحبوبة
دوا ….وداء
وبرغم الألم فينا
بنتحنىٰ بلون طينك
سؤال مطروح
سؤال مطروح قبل ماتخلص الطاقة
لإمتىٰ الوجع هيفضل ع الرصيف
نايم ف عز البرد
لإمتىٰ هنعيش كدا كُففا
محدش فينا شايف حد

admin

See author's posts