23 أبريل، 2024

” تراويح نفس ” للشاعرة : إيمان مصطفى _ مصر

إيمان

ايمان

تراويح نفس

وأنا سارح
فى دنيا الكدب ناب جارح
بطمن نفسى واتصالح
وألقانى ف خيال سابح
اسبح بسمك العالى
هنا نفسى اللى غرقانة
فى بحر أنين
بتوعدنى ..تعود تانى
وتغزلنى فى أحلامها
بخيط من ود ربانى
وربانى على الإحسان
دليل تانى… لقى نفسى
دى من مده مفرقانى
وآه يانى
من الفرقه وم الحرمان
زمان كان الزمان إنسان
ومش ناسى ..
ولا عاشق كلام مقلوب
وانا ماشى على الأشواك ومتحنى
ساعات قرفان
ساعات اصغر كتير بالحب عن سنى
وتتلخبط خيوط أحلامى
تغزلنى
طريق رايق
مفهش الا.. أنا وأملى
ومش تعبان.. ومش م الدنيا متضايق
صاحبنى والصباح فايق
رمى نظرة يامحلاها
بتتعايق
وبتفتح ورود خدى ومين قدى
انا ماشى على الدنيا اللى فرمانى
ولا تفرق
ومين يفرق
مابين البين وبين تانى
فى صورة.. كدب
دا انسان رخيص جداً ولا يسوى
مابين نَسوه وبين نَسوه
انا فاكر
كلام المولى ومذاكر
تفاصيلى
ومش هانسى
خطوط سيرى
انا اللى ف الهوا شارى
وانا البايع …كلام مايع
مايلزمنيش ..ولا يوزن
وراح يأذن لنا المولى بخير وافر
أنا معافر
ومش كافر بنعمة ربنا ..أصلى
أنا أصلى ..ومش تقليد
وأصلى فيا يتحكم…. ويغلبنى
دا لو كل الوجود سابنى
انا راجع
وانا فاهم
ومش واهم
أنا بَنا
ومين عنا هيتكلم
أنا أولى
مليش مولى سوا الواحد
أسلمله أمور نفسى
يسلمنى أمان وسلام
واى كلام ماحايفدشى
ننام ..نمشى
اكيد تفرق
مابين الحق والمحقوق هنا مفرق
يا إما تعايش الدنيا
ياما فى الهموم تغرق..
وصدقنى
انا اللى الفرح
بلحقنى فى أحلامى
وانا سارح