حسيت لو يوم
إنك جواك
أشجار من بوم!!!
في الليل
البومة
بتأمر أحزانها
تتشاف على مسرح روحك
وهتطلق بوحك
مزامير في الفضا بتنوح
تندب على كسرة أحلامك
قدام
صخر لايام
وٱلام
تتجسد بنقوشك
ولا حد يحوشك
لما تفرع كل دموعك
أشجار من شوم
والبوم …
يحتل الشجرة من الجدر
يقعد ويوزع في نوايب
م اللحم الدايب
في مصايب
مرات في الورك من الأحزان
وساعات الصدر الشايل كل هموم الدهر
تصبح وكمثل القطعة من اللحم
مفارقها الدم
اللي بيهرب من وش القهر
تلمح في السما قدامك صقر
بيهل بسرعة برق عليك
بمخالبه
و يا قلبه
لما يمزمز فيك
وصراخك
ما ينجيك
بومة أحزانك
عمالة بتندب
وتحدفلك حمم الوجع الطالع من بركانك
والصقر أمامك
عمال يتفرج على موتك
والنهش ..اهو طال حتى العظم
واللطم على الخدين ترفيه مش عندك
ودعت الدنيا بمتاعبها
محاسبيها بكافة ملاعيبها
نصبولك ياما شباك
.وأكم من فخ
ودخلت بكل إرداتك طائع
قام مطر الغدر عليك راح رخ
.ولا فيش
ولا كوخ أو سقف
أو حفرة تدارى جراحك جوه ف كهف
تستنجد بيها ..
تحميك
من توهتك
وما فيش
غير حرقة تصب غضبها
ف شرايين دمك
ويا همك
اللي يخلي
عيونك زي كاسات من جمر
تشربها وتنزف
وتناجي البوم الواقف على شجرة وجعك
لا يساعك كون
ولا سما مفروشة بالدعوة
تسمع صدى رجعك
ترميلك صبر
ويشوف مأساتك تاني الصقر
ويسن مخالبه النهاشة
تستسلم روحك للفتك
تتحول فيلم على الشاشة
ويشوفه القوم
وساعتها تسافر كالطيف
في فضاء الرحلة الأبدية
وتمدد ناسي الملكوت
ف تابوت
يتلاشي الصوت
يحلالك مناجاة النوم
لخلود بيشدك لبراحه
وتنام ما تقوم
والبومة
مازلت تندب ليلها عليك
والصبح تسلم رسالتها
لغراب
في نهار الكون ينعيك
More Stories
هاربه ” للشاعرة : رضا هيكل _ مصر
ياسيدي ” للشاعرة : لمياء صلاح : مصر
( امرأة تحترف الخجل ” للشاعرة : رشا طرابلسى _ سوريا