“حد السكين” كلمات الأديبة مرفت جابر

حد السكين
نُص مساحة قلبك فاضي
والمليان فيه نفسك بس
واضح جداً إنك عاشق
لكن عاشق حب النفس
يبقى ازاي بالناس ح تحس
أو تفهم معنى العاشقين ؟
دانت بتقدر فجأه تغيّر
دقّة قلبك كل يومين
فاكر إن الحب ف طوعك
بتمرجحه ف شمال ويمين
وانّه ف إيدك ع اللي يحبك
يعني غرام حد السكين
بس انا قلبي ماهوش مسكين
وما يقبلش يعيش مخدوع
إوعى تفكّر مهما يحبك

إنه ح يرضى يعيش ف خضوع
لو تفكيرك ف السكه دي
تبقى بتدخل ف الممنوع
قلبي يموت ف الهوى م الجوع
ولا يقبلشي ف يوم يتهان
أنا غير الدنيا اللي ف عينك
د انا جنّه وقلبي الرضوان
مش رح يسمح تدخل إلا
لمّا تكون عاشق هيمان
وامّا يشوف قلبك يتأكد
إنه ماهوش سجن وقضبان
وامّا يشوف حُبّك فيضان
حب حقيقي بدون حوارات
مش كلمات بلسان بتقولها
ولا أنانيه وحُب الذات
لازم ف الأوّل يتأكد

إن الماضي دا عدّى فات
وانّك مش ح تكون بحالات
إنما بالفعل اتغيّرت
مش ح تعود للسيره الأولى
إنما م الماضي استغفرت
لازم يضمن من دلوقت
إن هواك رح يصبح ليّا
وانت ح تحلف ع الإخلاص
هوّ دا شرط الحب ف قلبي
والإخلاص ف الحب أساس
دا نعيم الجنّه ما ينداس
لو مافيهاش ..
إخلاص ف الحب
……………………………..

admin

See author's posts