حتى من ضِلّك ” للشاعرة : مرفت جابر _ مصر

باغير جدا وباشتقلك
ولو حتى نكون مع بعض
بيخرج قلبي يندهلك
ويزرعلك ف حضنه الورد
وحتى الدق من نَفَسك
يزيد يمكن ما يخلص عد
ولو تسرح ف لحظه باغير
ولو تبعد دقيقه باغير
وضحكي بيتقلب تكشير
كأنّك باني مليون سد
باغير يا حبيبي ما انكرشي
وإيه الغيره غير أشواق
وأي حبيبه ما تغيرشي
أكيد ما تكونشي م العُشّاق
وانا الدايبه غرام وحنين

وعشقك ف الوريد ترياق
باغير لو ضحكتك زادت
واغير لو نظرتك زاغت
ولو شوفتك ف يوم ساكت
أغير جدا عليك واتهد
مدام عاشقه وقلبي كبير
وروحي تمللي مبتسمه
أكيد من حق قلبي يغير
عليك حتى من النسمه
وزي ما كان غرامنا نصيب
كمان الغيره دي قسمه
وقدرك قلبي بيحبك
وبيغير حتى من ضلّك
وطول ما هوايا مكتوبلك
ح اغير جدا لأبعد حد
طبيعة حوّا جوّايا

يا أدم حس بطبيعتي
وزي ما حبّنا حكايه
كمان إعمل حساب غيرتي
ما تحدفنيش مع التوهه
ما تفرحشي بعذاب حيرتي
وطول م الغيره من حقّي
ح تلقى الغيره تسبقني
مدام قلبك بيعشقني
بحور الغيره سيبها تمد
باغير جدا وباشتقلك
ولو حتى ..
نكون مع بعض

admin

See author's posts