ثقافة

” بنتك ” للشاعرة : ولاء حجازى _ مصر

بنتك
لو يوم بنتك تزعل منك
اوعى تسيبها وتهمل فيها
بنتك حضنك فرحك حزنك
ساكنة الجنة ف نن عينيها
إعرف مالها وحس حنانها
وروح طمنها وقرب ليها
بنتك زى ما هى رقيقة
اوعى تسيبها ف لحظة ف ضيقة
خليك عين من تحت رموشها
خليك فارس يحمى جيوشها
خلي همومها تقرب منك
لما البنت تقول مليت
اوعى تسيبها أثاث ف البيت
جمل ريتم الدنيا ف عينها
طب مين غيرك بس يعينها
خليك صاحب خليك والد
واوعى تسيبها لناس بايعينها
لو غلطت بالحسنة راجعها
وإسال دايما عن مواجعها
وإنسي مشاغلك روح واسمعها
وإعرف دايما إيه ف صالحها
وأما بتزعل قوم وصالحها
م إنت النور اللي بيهديها
قرب منها وخد ب ايديها