” من بين الشيش ” للشاعرة : سميرة محمودي _ مصر

من بين الشيش المتزوق
بخيوط الضي
باهرب من خوفي
اللي يموت
وباقول انا حي
باكسر قضباني المتلون
بسواد الليل
وارسم احلامي اللي
احتارت مع بكرة الجي
واتبسم يمكن بصعوبة
مع دمعي النازل ع الخدين
باستني الفرحة المشطوبة
من عمري سنين
وباغير صورتي المقلوبة
وباعدل فيها شمال ويمين
مع يأسي البايت جوايا
باتحمل والصبر معايا
وباحدد ارضي وسمايا
واعرف انا مين
من بين الخلق النعسانة
من نزف جروحي السكرانة
من وحي الوحدة اللي رمتني
في سجون الدنيا المليانة
جوايا الصرخة بتتألم
ولمين راح تحكي وتتكلم
تنتنفس نارها وف ضلوعي
والدم بنارها بيتسمم
وباشوف الحلم بيتبعتر
والعقد المفروط قدامي
عمري اللي انا عشته
عذاب اكتر
بالحب مشيت انا أيامي
ورميت الدنيا دي قدامي
عديت ع الصعب واتاريني
انا كنت باعدي باوهامي
كان لازم ضربة تصحيني
وتزيل الغمة علي عيني
يتهدم سجني اللي بنيته
واتفاهم بين روحي وبيني
افحت في حيطاني المقفولة
واصحي الفكرة المسطولة
وارجع من سكة اوهامي
واختار السكة المعقولة
اتخلص من نوبة خوفي
معقول استسلم لظروفي
وحياة شيش بيش
بالامل الفاضل هاتشعبط
علي الضي الواصل من بكرة
هاتحدى واعيش

admin

See author's posts