امي ” للشاعر : محمد حمدان _ مصر

عاملينلك عيد ودي مش ساهلة
والله بجد دي ناس جاهلة
طب هو العيد راح يبقاله عيد
او تهدي الشهد كدة لنحله

اذا كات الجنة ف مداسها
طب هنقول ايه كدة عن راسها
او احساسها
دور على اعلى مقام ف الكون
هتكون اعلى منه واحلا

عاملينلك يوم
من حقك والله سنين بالكوم
وهتبقى برضو ماليها لزوم
قدام الحب بتفاصيله
دي بحور وانا نازل فيها باعوم
قلبك ياما عاش بيا انا مهموم
والفرح بدعوة يكون مرسوم

ايا بحر حنان و يا حضن امان
لو يبعد بينا الف مكان
احساسنا بيوصل زي الوحي
والوحي مهوش محصور قرآن

الوحي كأني بقيت موسى
واهي روحي بدعوة محروسة
وهمومي بتصبح مكنوسة
والبر امان

بتوصيني كتير على نفسي
من قبل ما اقول اه بتحسي
وان قولت خلاص روقي وارسي
بتقولي مفيش غيرك ليا
ده انت حبيب قلبي وعنيا
وانت لروحي اجمل عنوان

بيقولو عليا ان انا شاعر
شاطر ان اوصف ف مشاعر
لكني بجد ضعيف فاشل
اني اوصف احساسي انا بيكي
ايا باب الجنة وشبابيكي
على احلا حياة
هافتكر ازاي وف يوم واحد
الي ف عمري ما ف لحظة انساه

admin

See author's posts