” إلى أمي ” للشاعرة : نهلة الديب _ مصر

وحشتيني
دخلت البيت أناديكي
توقعتك تقابليني
أقولك غمضي عنيكي
تقولي أهو يانور عيني
أبوس خدك مع ايديكي
وأجري بلهفتي عليكي .. على حضنك تشديني
وحشتيني
تخيلتك على السجادة .. بتصلي
وكالعادة .. دعاكي خشوع وتجلي
بكل الخير لكل الناس بتتمني
وآخر دعوة تدعيها .. تكون لِيا
إلهي يسترك يابني ف الآخرة وف الدنيا
ويكفيك شر أحبابك ويكفيك غدر أصحابك
ويبعد عنك الأعداء
ولا تشوف يوم ببدنك داء
وأمِّنْ ع الدعا وكأني ف الجنة
مابين ملكين على جناحهم .. بأدلل وبأتمنى
أشاور واطلب الممنوع
تردي بصوت يدوب مسموع
إلهي يابني تتهنى
وحشتيني
لحظات الفرح ولَّت
وسنين البُكا طالت
حبايبنا الكتير قلِّت
ف طريق العِدا صارت
حتى اللَّمة ما بِقْيِت
م الآخر معاك ماتت
وحشتيني
بَضُم الصورة واحضنها
بوشوشلك بأسراري
مين بعدك هآمنها
يا بير للسر مِدَّاري
وحشتيني
في حضن الصورة بتنهد
وأقول فينك وحشتيني
بخبي دموعي وبْتِعْنِد
ونزلت برضو من عيني
مع التنهيدة والخنقة
بنادي وأقووول ..
وحشتيني
وحشتيني

admin

See author's posts