دار العجزه ” للشاعرة : مرفت جابر _ مصر

لمّا يابن القلب تقسى
خلّي نقطة رحمه عندك
إفتكر ف الماضي لمّا
قلبي شالك عز ضعفك
وافتكر دمعات عيوني
كل يوم وانا شايله همّك
كنت اقوم من أحلى نومه
عز برد الكون واضمّك
كنت ادفّيك رغم بردي
حتى لو بالغصب عنّك
وامّا تصحا بابتسملك
واحضنك واضمن سلامتك
قبل ما تنادي ياماما
قلبي يجري يا قلب مامتك
يبقى قبل الكلمه عندك

كنت اخبّي اللقمه منّي
لجل تسند بيها قلبك
كنت اسد الريح بضهري
خايفه نسمه تيجي يمّك
إفتكر كلمة يا ماما
إللي كانت سعد أمّك
إفتكر كل اللي فايت
إفتكر واقسى براحتك
ربما تعتر ف حاجه
تحمي أمّك من قساوتك
أو تحط ف قلب قلبك
نقطه من رحمه ومروّه
صرت بعد القوّه ضعف
وانت بعد الضعف قوّه
ليه عليّا بتبقى نوّه
رغم بدني بات عليل

راح صباحي يابن بطني
ف انتظار ليلي الطويل
هي لقمه يادوب ونومه
يعني حِملي ماهوش تقيل
عمر قلبي ما كان بخيل
وانت ليه تبخل عليّا
حتى كلمة عطف تسند
ضهري ف ساعاتي اللي جيّه
جت منين القسوّه ديّه
والجحود والظلم يابني
دانت يابني حتّه منّي
قلبك ازاي فجأه يقدر
يلقى نفسه ف بُعده عنّي
طاوعك ازاي تمشي بيّا
يم دار العجزه يمكن
كرسي جوّه الدار يشيلني

يابن بطني ازاي تسيبني ؟
هو يعني ..
كرسي دار العجزه أرحم
من حنانك يابن بطني ؟
بكره تتمناني أرجع
ما تلاقيش لرجوعي حيله
بكره تلقى سنين طويله
فيها قلبك نفسه يسمع
دعوّه كنت بقلبي دايما
بادعيهالك

admin

See author's posts