ضحكت فبشرناها ” للشاعرة : إيمان مصطفى _ مصر

ضحكت فبشرناها فزادها الفرح فرح
كانت بتحب الورد البلدي
و بتزرعه جوه براح ل احلام
‏كانت ياسمينه بريحة الفل في غيط ألغام
‏بتحب خبيز الحب
ليلاتي تفرق عيشه على الأيتام
‏وعلى المساكين
‏احساسها تكيه لكل حزين
‏بسهوله ولين بتلم الحزن من الصابرين
‏عارفه إنه أمين ومرابط في القلب وفي العين
‏بتعيد تدويره بحبة صبر
‏بتضيف قنطار م الخير والجبر
‏ينقلب الحال
‏ونلاقي الحزن فرح شغَّال
‏سبحانه مبدل دي الأحوال
الحب دا سحر هواه قتَّال
وبرغم دا كله القلب يئن
والروح بتفن
وبتبني بيوت في قصايد تتشرط بشروط
وبتقفل بينها وبين الهوا أبواب
عندها أسباب
متصالحة وراضيه وقادرة تفوت
مَهْمَاً كان فيه صعوبات وضغوط
همها تحمي بنات أفكارها
وتوّصلها لحد مدارها
تسرح وتسبح في الملكوت
وتعيش حتى ان صابها الموت
لسنين وسنين
توْصَل رسايلها لأبعد فين
ماحناش عارفين
بس هاتوصل
وهيشهد لها الكون ويقول :
(ضحكت فبشرناها )
فزادها الفرح فرح

admin

See author's posts