” ملاية التوجهات ” للشاعرة : إيمان مصطفى _ مصر

ملاية التوجهات
من ديوان (من حزن الحظ )
إفرش ملاية التوجهات
وانفض وعفر يا جدع
م تخافش لو جاي الممات
أصل الحكاية مش ودع
ولا وشوشة دكر الصدف
ولا حلم مخنوق انعزف
على عود طري
من غير وتر
شفت الخطر
رص الوجع
فوق الوجع
دنيا البدع
فيها الحبال متنتورة
سايقة الهبل..
قدام ، ورا
وقلوب غلابة،، القنطرة
منصوبة فوق بركة زمن
بالأمر رخصان التمن
وعقود محن
وتكلفت الإحساس
ضغوط
يا عقول ماليها العنكبوت
يتمرمغ الفكر التمام
وسط الزحام
يا قلوب رخام ..متسلحة
وسكنها أشباح القلق
صوتي انفلق
وسط الفضا
شفتوا الغيوم
بخِّتْ سموم
نسجت سيول اللحمة
من غير السدى
بقى تبويشات
سرسب حاضرها ع اللي فات
ثارت عقول الأفئدة
واتنططت أفكار عيال
جوه ملاهي الأوردة
والساقية دارت في الهوا
قام اكتوى
شبح شيطان وهم العدا
هيلا هوب
داس كل البدع
تحت المداس
اتبدل الإحساس رضا
يطرح ندى
أم باس خدود الورد
وهدوم الشجر
غار المطر
شفتم كدا !
يحدف على الدنيا السلام
من غير كلام
دخل القلوب وسكن يدوب
قام زقه تيَّار الوجع
دنيا البدع
نفس البيوت نفس الخطوط
اللى اترسم جواها
توب الأخطبوط
يفرش ملاية التوجهات
عاد اللي فات

admin

See author's posts