ثقافة

” احذري الرجل اللطيف ” للقاصة : شاهيناز الفقى _ مصر

احذري الرجل اللطيف

مين فينا مش بتتمنى تقابل راجل لطيف في حياتها، تطمن له وتستند عليه وقت الشدة وتشعر بالأمان إنه موجود معاها.
الراجل اللطيف ده ممكن يكون زميلك في الشغل اللي لما يشوفك مرهقة شوية يقولك بمنتهى الحنان قومي أنت روحي وأنا هكمل الشغل عنك، واللي عادة بيكون ماسك الانشطة مع فلانة وعلانه وبيطلع رحلات وبيعمل جمعيات مع معظم الستات، أو ممكن يكون جارك اللي كل ما يقابلك وأنت طالعة السلم يشيل عنك شنطة الخضار أو يفتح لك باب الاسانسير ولما تحصل اي مشكلة بين ستات العمارة بيكون هو المتطوع الوحيد لحل المشكلة دي، وبيكون هو القلب الكبير اللي بيلم الشمل ويزيل الخلافات، أو ممكن يكون الرجل اللطيف هو حد من الاقارب اللي في كل أزمة بيقف معاكي ويأكد لك في كل مرة أنه مش عاوز منك حاجة خالص وانه بيعمل كدا لأن ده واجبه ولأن عنده شعور إنك مسئولة منه.
معظمنا بيقابل الشخص ده في حياته أو نتمنى نقابله لكن خلي بالك عزيزتي المرأة واحذري الرجل اللطيف. لانه ممكن ما يكونش لطيف خالص ولكن عنده متلازمة مرضية اسمها متلازمة الرجل اللطيف..
وهو نمط سلوكي نفسي يعبر عن صورة اجتماعية يرسمها الراجل عن نفسه خاصة مع السيدات اللي يعرفهم، يعاملهم بمنتهى اللطف طول الوقت، دايما بيعرض المساعدة ودايما بيقدم خدماته، ولكن اللطف ده مش لوجه الله ومهما طال الوقت بيكون في انتظار مكافأة من المرأة له على معاملته اللطيفة معاها، والمكافأة بالنسبة له لازم تكون علاقة عاطفية أو جسدية ،وبيشعر بالاستغلال لو المرأة رفضت لانه طول الوقت لطيف وبيقدم خدمات وفي انتظار إن المرأة ترد له جمايله.
الراجل اللطيف ده مش بيعترف بينه وبين نفسه بحاجة اسمها زمالة أو صداقة بين الرجل والمرأة، بيشوف ان اي علاقة بين راجل وست لازم تكون عاطفية وجسدية، في حال رفضت المرأة انها تعمل معاه العلاقة دي بيتحول اللطف ده لتحفز ضدها، يعني في الشغل يحاول يمسك عليها غلطة ولو جارها ممكن يسحب منها الاسانسير او يطفي نور العمارة وهي طالعة، أو لو من الاقارب يقلل من مبالغته في اللطف معاها، وفي كل الحالات الرجل اللطيف بيحاول يخليها تشعر بخسارة كبيرة لأنها خسرته ومش بس كدا ده الموضوع ممكن يتطور و يوصل للقتل كمان … مش قلت لك احذري الرجل اللطيف.