” ما تزعليش ” للشاعرة _ حنان إبراهيم حافظ _ مصر

ما تزعليش
**********
داخل عليها بكل شوق
نظرة عينيه متلهِّفة
وكإنها
كانت حبيبته وغايبة عنُّه من سنين
ولْحضنها واخده الحنين
لكنَّها متقيِّدة متكتِّفة
حاول يفكّ قْيودها عارف
إنَّها بْغدر وْ خداع متغلِّفة
لْزينْة الشباب مستحلفة

قلبه الملاك .. حبّ الهلاك
لو كان فدا لعيون حبيبته اللى بدرعه بتحتمى
فوقها بدون تفكير بسرعة بيرتمى
يعلا الصياح
كل القلوب معصورة عصر
أمّا الحقيقة انُّه ما كانش حاضنها هيّه
كان بيحضن أمه مصر

زاد الصراخ .. صقف وصفير
صوت انفجار أشلاء تطير
فضَّل يموت … علشان بقِيت الناس تعيش

لكن يا مصر ما تزعليش
إبنك حصل له كل خير
وهناك أكيد احسن كتير
طبعا … هناك احسن كتير

admin

See author's posts