زينة رف
ف دقة عقرب الساعة
بنفقد جزء من روحنا
خبايا الروح على وشوشنا
وبتكرمش ف تفاصيلي
غريبة الدنيا خداعة
بتندهلى تغنيلي
أأمن ليها وأطمن
فتتمكن ف تحويلي
جريمتى طيبة وسذاجة
وقلب كسوتة بيضا
وبعد التوهه ف الغابة
أكيد يمشي مع الموضة
ظلمنا روحنا بإيدينا
والف سؤال بيطرحنا
جواب يرسم ملامحنا
ومين فينا كان مظلوم
ومين لايم وكان مهموم
ومين الدنيا لو ضحكت
تسيبة يدوق حلاوة يوم
وبندمع من الفرحة
دا خوف ولا دى مشاعر
وبنعيط على الأحزان
قلوبنا ماشية بتساير
وفى إمبارح
و فى بكرة
مابينهم ٣٠٠فكرة
بنتمنى نكون إحنا
ونمسح لحظة لونها هموم
فى ناس غالية لكن قلِت
وناس من غيرها ما حِليت
وناس تمشي ولا تأثر
وناس ندالتها عاوزه الزُوم
ودنيا قاسية بتعلم
ف قلب طيب وبيسلم
وكان هادى ومستسلم
وبعد القسوة بقى مرحوم
عشان زاد العناد فينا
مسحنا طيبتنا بإدينا
وسبنا روحنا تتغرب
منين الغربة تحمينا
ودى لمحة من الدنيا
ولسه الجاى أكيد أكتر
شيطان ودماغة بتفكر
ولو مكسبش يتحسر
فحول رشدنا لجنون
وخلصت قصة من كام بيت
تنز جراحها جوا الحرف
عشان سبنا دماغنا تزيط
وزى كُتبنا زينة رف
More Stories
حين تدق ” خاطرة للشاعرة : خديجة الرفاعي _ المغرب
أستيقاظ ” للشاعرة : إيمان السباعي _ المغرب
وجاء الرحيل ” للشاعرة : روحية صلاح _ مصر