” محكمة الحياة ” للشاعر : محمد ابوالخير _ مصر

محكمة الحياة

حكمت محكمة الحياة
على حب الفقير بالموت
والقاضى بالمختصر
أموور وشاب كيووت
والشعر كان أصفر
فاتح بلون بهتان
غير شوفات النظر
ماعرفش تبقى ريبان
لابس قميص محترم
واظنه كان كتان
والمحكمة رهبه
وأصل القانون واجب
شرب أوام قهوتة
وناده على الحاجب
محكمة

الشحات صابر الفاضى
موجود ياسي القاضى

شحات وصابر فاضى
قلبي انشغل مره
ونصحنى شيخ البلد
ونهانى 100مره
ولافيش فلوس ف الجيب
ولادور فى جمعية
ولافية عقود للسفر
ولاهجرة شرعية
ونا كان اثرني الهوى
وحياتى كات مره
وبنت شيخ الغفر
كات للعيون ثاره
لميت جميع خلجاتى
الدايبة والعره
وركبت موج البحر
ابعد عن القاره
وف وسط موج البحر
ريحت المرار هافه
علشان عروسة البر
حركت انا الدافه
وفاجأه الرياح هاجة
من حظى كارهانى
وقلبت معاها الموج
وغرقت لودانى
ورجعت تانى لهنا
مهزوم لاوطانى
حتى اللى كان ع الجسد
تاه منى آه يانى
وعرفت أن الهوى
مايكونش مجانى
ومعترف بالذنب
ولاشفقة بالجانى

admin

See author's posts