14 يونيو، 2024

وحشتيني ” للشاعرة : سامية عبد الرحيم _ مصر

سامية عبد الرحيم

وحشتيني ولسة فاكرة
كلامك
وصوت قرايتك
لقرآنك
وخشوع قلبك
بصبر للخالق
سنة عدت وراها التانية
وإنتي غايبة
وواخدة كياني
وروحي رايحالك
دموعي مش عشان بعدك
ولا حتى وفاتك
دموعي اني بقيت عريانة
وبردانة
وغايب عني سؤالك
جذور صبري لنصحك عطشانة
وبذرة إيماني تناديلك
مهو انتي زرعتيها فيا
بقوة إيمانك
وحشني حضنك
وإحساسك الصادق
ونظرة عينك لعيني لما
بكون بصالك
وانا منك بداري خوفي
وأخبي حزني وأسراري
فيكشفني ذكائك
وحشتيني وانا من غيرك
جمل همه تقل
تهزه الريح
أنخ وأقوم
ولكني
شبهك وطلعالك
بصد الدنيا
واشد لجامها
وأرجع تاني
أتحكم في زمامي
مهو متأسس متين
يشبه زمامك