حنين ” للشاعرة : ميادة الحداد _ مصر

كان زمان كان ياما كان

جنب بيتنا وف حارتنا

ساقية بتلف الزمان

تسقي فينا الخير ودايماً

كنّا نلعب جنب منها

هى قدمت مين يعينها

لمّا صَدّى العمر روحها

كرمشت وعجزها بان

‏كات لعبنا بجد روعة

‏نلعب الئال الجميلة

‏نلعب الحجلة نغني

‏واللى تكسب تبقى ليلة

‏واللى تلعب منا سيجا

‏تبقى اجمد بنت شاطرة

واللى يبقى لسانها احمر

تبقى فاطرة

والولاد كانت بتلعب

بالحجارة والعصايا تريك تراك

الحق العصفورة جريت من وراك

البلاط راصينة سبعة

واللى يخسر بيشلوه كدهُه مرابعة

كهربا مين شد كُبس الحب منّا

اشتياقنا للبراءة امّا كبرنا

كنّا ع الطبلية نقعد بالساعات

ماما لما تقول لبابا بسرعة هات

هات لهم لانشون ورومى

البنات خلونى اطلع من هدومى

ذاكروا حبة

بعدها على طول تناموا

طب يا ماما

القناة الأولى ديا

‏ جاى عليها مسرحية

‏نفسنا نسهر شوية

‏قوموا ناموا

‏اما تبقوا فى الأجازة

‏الدلع دا مالوهش عازه

‏قوموا ناموا

قومنا. نمنا

لسّا بصحى جت عنيا

ع الماسينجر

شفت احلى شريط حياة

قمت ادور

ع اللى باقى من حنينا

لسّا عايش جوا منّا

بس تاه

‏
‏