كل يوم أقعد وافكر ” للشاعرة : كريمة محمد _ مصر

كل يوم أقعد وافكر
نفسي اشوفك ف المنام
واما يجي الليل أقرر
أني أبعتلك سلام
إني أكتبلك رسالة
إن حالي مش تمام
إني مشتاقلك يابويا
واني محروم م الأمان
إني دايما أقول لنفسي
كنت فين أنا من زمان
أما كنت أنت معانا
وكنت أنا قليل الكلام
كان مُناك تشوفني بضحك
أو أزود في الكلام
كنت تتمناني أصارحك
ع اللي فيا من آلام
كنت أجاوبك بابتسامه
وأن كل شئ تمام
كان في بالي أنك مطول
ليه مشيت من غير سلام
طب انت ماشي وراضي عني
ولا كان بينا خصام
نفسي أسمع الإجابه
يمكن أعرف يوم أنام
كل يوم أنام وأغمض
يمكن اقابلك في المنام

admin

See author's posts