ثقافة

ارسمني ” للشاعرة : زهرة يونس _ مصر

ارشيف

ارسمني ولون أيامي
اللي بعيشها معاك
ارسمني الزهرالشوك الندى
زي ماارسمني هكون جواك
رتب افكارك كدة بهدوء
ماتجيش م الوحدة تقول مخنوق
اخترت البعد عن الصحبة
لاجل ف الغربة تلاقي لقمة
اوعاك تشتكي من مرارتها
اوعاك ماتكونش ياواد مشتاق
لترابي وشجني وموالي
للوجع اللي انت عانيته زمان
م الخنقة وقسوة أحضاني
عارفاك ابني وأغلى العشاق
ماهو كل دقيقة انت ف بالي
بستنى تعود واكيد هتعود
دة النيل بنى عصبك وسماري
محفور ف ملامحك يا الغالي
انا شمسي الضلة محاوطاها
والمر معشش ف غناها
والورد الطارح في جنايني
دبلت ألوانه من العتمة
الزحمة عطشها بيرويني
وانا لسة الماضي بيحكيني
بيقول ام الدنيا العاجزة
في دواها السم بيغويني
بيقول انك يوم لو ترجع
رح تحتار وهتسأل: فيني؟
ف ارسمني وحاسب م الألوان
الباهت بقى صوت الانسان
والمطفي دة لون العزة كمان
والصارخ بقى دم اخواتك
مستني الحق ف يوم هيبان
مش ضل ونور زي العادة
دة الضل مسيطر بزيادة
والنور اتسرسب في الغفلة
والضي اتغرب عني وهان