19 مايو، 2024

“غياب القدرة” كلمات الشاعرة : توتو الخميسى _ مصر

غياب القدرة على حسن الاختيار.

واحد قريبي بيحكي معي
بيقول:
عندي ازازة برفان حلوة قوي وغالية تمنها حوالي ألفين جنيه تقريبا

المهم حصل مشكلة في الازازة ومش بيخرج منها البرفان

روحت لمحل تركيب عطور عشان يصلح الازازه
للاسف مانفعش
فطلبت منه انه ينقل البرفان لازازة تانيه فاضيه عاديه .

بالنسبالي كان حل مناسب
انا مش فارق معايا شكل الازازة انا فارق معايا اللي جواها

وعملت كده واخدت الازازة القديمة اهو احتفظ بيها تبقي عندي وخلاص

وفِي يوم كان بيزورني واحد من أعز أصدقائي في البيت ووسط كلام كتير قولناه عينه جت على ازايز البرفان

فقالي
ايوا يا عم الناس اللي بتجيب برفانات حلوة
المهم قبل ما يمشي من عندي افتكرت ان فيه حد كان جايبلي ازازة برفان وانا مافتحتهاش

هي صحيح شكلها حلو بس مش اورچينال (أصلي ) وتمنها حوالي ١٥٠ جنيه.

روحت مطلعله الازازتين الغالية اللي انا نقلتها في ازازة عادية
والتانيه الرخيصة وشكلها حلو ومقفولة

وقولتله اختار يا معلم ازازة من الاتنين تاخدها
طبعا ما صدق وما حاولش يقول لا

قالي
يعني اختار اي واحدة من الاتنين

قولتله
طبعا يا ابني هو احنا هنهزر

قالي
يعني لو اخدت الجديدة المقفولة مش هتزعل

قولتله
لا طبعا مش هزعل
انت تختار اللي انت عاوزه والغالي للغالي

المهم اخد المقفولة اللي شكلها حلو

اللي شغل بالي انه ما حولش يجرب لا ريحة دي ولا ريحة دي

هو اختار الشكل بس
ما يعرفش ان اللي محطوطه في ازازة عادية تمنها ٢٠٠٠ جنيه
والتانيه اللي شكلها حلو بس تمنها مايزيدش تمنها عن ١٥٠ جنية

الحقيقة ده اللي احنا بنعمله كتير فى حياتنا وبيتحكم في اختيارتنا

اغلب الوقت بنختار الشكل الحلو
بيغرينا المنظر
بننبهر بلفة الهدية
من غير ما نقرب ونجرب ونحكم
ما عندناش القدرة علي فرز القيمة والجودة

البرفان الغالي الظروف اضطرته يعيش جوا ازازة رخيصة
لكن ده ما قللش من تمنه ولا من كفاءته ولا ريحته الحلوه اللي يميزها اي حد بيعرف يمييز

لما تتيح لك الظروف ان تختار فدى فرصة ذهبية لتختبر قدرتك علي التمييز والفرز

كن راقي في اختياراتك
واوعى تغشك المظاهر.