” فرصة تانية ” للشاعرة : إيمان مصطفي _ مصر

لو مش انت الباقي ليا
بعد منك إيه بقى لي؟
لو هجرت دموع عنيا
لخطوتك هتكون دليلى
ياللى كنت أنا وأنت واحد
مفترقش سنين طويله
ياللي عشت معاك ليالى
كل ليله من جمالها بألف ليله
وكل ليله عقد لولى
يلالى من أشواقنا،
من نور المشاعر
تبقي شاعر، وأبقى شاعر
نكتب الأحاسيس قصايد
تلمس الأرواح تقيد
المعانى الحلوة تركز
في القلوب، الشوق يزيد
ليه بعيد دلوقتى عنى؟!
ليه سايبن لفكر سارح
ليل نهار؟!
بلتمس أعذار كتيره،
لسه إيه أنا بيه هسامح
ليه مليتنى ظنون وحيره
من سكوتك، من شرودك
دانت كان يطربنى صوتك
لما بحنانه يلاغينى
كات بترقص فرحتى،
ويبان جمالها ف ضى عينى
كان براح حضنك حامينى م الوجع
عمرى ماخطر لي ان ممكن
نبقي ذكرى لصورة دوبها الزمن ولا قصه يادوب صداها يتسمع
طب هقولك
تيجى نبدأ من جديد؟!
تيجى نتصافى سوى ويا الحياة؟!
فرصة تانية……!
ربما…………!
ربما تبقي لنا تانى طوق نجاة!
بصلى بصة محبه
يرجع القلب لصباه
افرد الجناحات واجيلك
تبقى صبحى، وأبقى أنسام عطر
ليلك
هبقي نيل تشرب حلاه
ياللى حبك فرحتي،
وأملي ودليلى
لو مش انت الباقي ليا
بعد منك إيه بقى لي؟!

admin

See author's posts