” ببعتلك كل ليله ” للشاعرة : وفاء يوسف _ مصر

ببعتلك كل ليله
من قلبي ميت جواب
ومعاهم ميت تحية
مكتوبة بدمع عيني
عن شوقي إللي فاض
سايباني سنين طويلة
متغرب ف البلاد
ولا حتى مرة فيهم
بترديلي بجواب
طب حتى إرميلي كلمه
فيها نظرة أو عتاب
كلمة تطيب آهاتي
وتداوي جراح سنيني
أنا يا أما برضو إبنك
أرجوكي إسمعيني
خديني بين جناحك
م الليل يا اما وخبيني
يا امه الغربة طالت
شابت فيها سنيني
روحي فيها تاهت
مش شايف غير حنيني
طريقي كله ضلمه
أرجوكي ارحميني
يا امه مدي ايدك
و بقلبك أحضنيني
خبيني جوه منه
م الليل حتى الصباح
إمسحي كل الليالي
داويني م الجراح
دا انا ياما برضو إبنك
متربي في عز عزك
ويوم ما غبت عنك
زاد فيا أنيني
وما شفت يوم فلاح
دا يوم ما تكوني راضية
بتغني ليكي شادية
م الليل حتى الصباح
يا شمس الدنيا يا امه
يا نعمه م الإله
خبيني جوه قلبك
م الضلمة والضباب
أنا عايش جوه روحي
غربة وبركان عذاب
ضميني وعوضيني
عن عمري إللي غاب
إبعدي عني الليالي
وواسيني في الغياب

admin

See author's posts