حسين ابو حجاج يفتح قلبه لأخبار اليوم المصرية

حاورته : سحر جلال

الفنان حسين أبو حجاج ترك بصمة للسينما المصرية فى خلال فترة وجيزة ثم ترك التمثيل وعاد إلى عمله الأساسى

– بعيدًا عن التمثيل أنت أصلًا أيه؟
= أنا راجل عندي ورش كاوتش سيارات صنايعي يعني، والورشة بتاعتي في وش قصر ثقافة بلدنا فكان فيه مخرج بيعمل فوازير رمضان للقناة السابعة في المنيا فـ كلمني وقالي عايزك تعمل معانا كام حلقة في الفوازير قولتله بس أنا مبعرفش أمثل قالي متقلقش هخليك تمثل والموضوع مش صعب وفعلا عملت معاه 5 حلقات وكانت من أنجح حلقات الفوازير

بعدها بقى ابن عم هاني رمزي جاري علطول فـ قالي أنا رايح عنده البيت تيجي معايا قولتله يلا أول ما شافني قالي يا عم حسين انت كاركتر هايل وأنا مش هعملك حاجة أنا هاخدك معايا والناس هتعرفك علطول فـ خدني في صعيدي في الجامعة الأمريكية جابلي كرسي وقعدني وكل شوية يجيلي بحد مرة االسقا مرة هنيدي مرة مدحت العدل وكلهم كانوا مبهورين ورغم إن الفيلم كان أغلبه خلصان بس خلقولي دور وكان دور لؤي ومنها الناس كلها عرفتني ووعملت حوالي 10 أفلام في سنتين

عملت بعدها قصة الحي الشعبي وكنا في رمضان .. كلمني الحاج أحمد السبكي الساعة 12 بالليل وكنت في المنيا قالي تعالى عايزينك وصلت عندهم الساعة 4 الفجر والمشهد كان إن نيكول سابا بتخش فـ المفروض أبوس إيدها قولتلهم لأ أنا مش هبوس إيد حد، احنا في رمضان وصيام قالولي فيها أيه يا عم حسين كله يتمنى يبوس قولتلهم أنا لا أتمنى قالولي طب اعمل نفسك وهي تسحب إيدها قولت ماشي فـ لما جينا نعمل المشهد تقريبًا هي كانت عارفة إني رفضت أبوس إيدها فـ نفذت الحركة بطريقة غبية شوية

– طب وأحمد مكي؟
= ده حبيبي أستاذ أحمد مكي، لما جيت أعمل معاه الكبير أول ما دخلت وشافني قالي “أنا بموووت فيك” .. الكبير أصلًا كان جزء واحد ومكناش عاملين حسابنا على أجزاء منه بس عملنا 5 أجزاء كنا مع بعض أسرة