17 فبراير، 2025

“مكانش يشبهنى” كلمات الشاعرة : رضا عبد الوهاب

مكانش يشبهنى !!!
مع انه كان
نفس ملامح روحى والتفاصيل
كت حساه المراية والبداية
والنهاية اللى نهاها بقسوة بدرى
شد بايديه ستاير الليل الطويل
بلونها الداكن الغامق
اتقبض قلبى .. وقلبى عنده مكانش فارق
واتشرخ فيا ضلوعي
وكلى كان من قبله طوعي
كنت فرشة عمر جى
فوق طريق من لحمى حى
كنت تحويشة سنيني / جوا زير عطشان لمية
كنت ليك بنية / كنت لي قشة وضى
كنت زرعة ف أرض بور
كنت وسط العتمة نور
كنت طوق نجاة لغريق / كنت ف السكة صديق
كنت غية لطير مهاجر / كنت هاجَر
لما وهبتلك صبى
وكنت نبى ووحى ورسالة
كنت مريم ارتضيت كل الملامة والعتاب كنت بفرش جتتى لروحك أعتاب
لجل خاطرك/ كنت دون الكل سترك
كنت كل غيمة طالة ف عيون السما
كنت طفلة تخطف السكة تلملمها ف ايدك
كنت قُبلة الحياة / كنت لى قِبلة وصلاة
وليالى مؤنسة / كنت بيك متونسة
كنت ضليلة وشجرة / كنت مطرة
أخبى فيها دموعي واجرى
ارسم حدودى فوق خريطتك
كنت بنتك اللى ياما قسيت عليها
و تستخبى جوا حضنك
فجأة سيبت / فردت ايدك للبراح
بعد صوم العمر وسنينى العجاف
كنت بغمس حزني حاف واتلفّع بجيدك
وأوصل الأشواق طريق
بعد ما رطبت جوفى بطعم ريقك
نشفت لى ميت الف ريق
ولا اتهزيت .. لو حتى زيف
ولا هزيت نخلك الطارح
لجلٍ اكسر صيامى بحلو تمرك
دوقتنى ليه طعم مرك
و خبزت خدودى للمارين رغيف
اتصدقت بكل مشاعرى بعمرى / بشِعرى بخصلات شعرى / بعلنى بسرى
ودمعى بيسرى لمجرى ورديدك
صابب كل خلية ف دمى
كنت بتقول بنت عمرى وانت امى
يعنى واصل لحشايا
واللى رابطك جوا منى حبل سُرى
ليه قطعته قبل مايتم الفطام
والمخاض اصعب مافيه
لما يبقى طلق قسرى
بُعد حصرى
كان فاضلى لسة حبة عمر باقى
واشتياقي والتلاقي وكل سم وكل مللى
كنت كلي اللى فاضلي
كنت بحلم باللقا والورد والنيوتيلا
والحضن اللى لما اشوفه اجرى
كنت بستنى انى اسمع من عيونك
كلمة لسة حروفها ناقصة الف كلمة
من حروف الابجدية
اختصرت اللى مابنا
ف حرف نصب وحرف علة
والطريق أصبح موازى
واللى فاضل لسة منى
خط مرسوم من ملامحك / كدب فاضحك
زى شمس وعينها قادحة
أو كسحر حلال وصابنى/ سهم نافذ
حكمه كان نافذ وحافز له يبعنى
رُفعت الأقلام عن بنت كان لساها بكر
ملفوفة بالسلوفان
مكانش يشبهنى !!!!