“افرد شراعك” كلمات الشاعرة : رضا علد الوهاب

افرد شراعك ياوجع جوَّا الوريد
ومن تانى عيد ..اللى انتهى بنَّا
وافرش جدورك مدَّها فيناوزيد
بعترغيطان الحشا باللى وقع منَّا

وابدأحكاوى زمااان أوى
خلينا دايما مجروحين
اوعى تطيَّب جرحنا خليك قوى
دوس على رقاب العباد
افتح مزاد … ألادونا ألاترى
قوم يللا بيع اللى اشترى
خصم واوكازيون ع المشاعر والقلوب
اوعى تتوب فرصة لقلوبنا تترمى
وقطع الغيار تحت الطلب
ولافيه عشم .. ولافيه عتب
دول ماتوا يااااه من كام سنة
اتقلبوا جنب اللى اتقلب واللى اتغلب
من وقت ماالقشرة الصفيح
صبحت دهب

اقطع أوى كل اللى كان أبتره
خليه بعيد ..اوعى بعينك تنظره
ماراح زمان الطبطبة والمجدعة
اربط على قلبك حجر واكسره
والجم لسانك عن كلمة حلوة طيبة
إوأد بنات افكارك لوفكرَّت …تغيره

اقسى اوى وانسى اللى فات
أبدر رفات بِكر الغرام …وبعتره
والمس بايدك ع الوجع والذكريات
مين فينا قدر لنصيبه مرة يغيره

طب أقولك
اكتبنى ف خانة الوفاة
اكتبنى ف خانة الوفاة
طلع شهادة إنى فارقت الحياة
ما انا كدا ..والله اصلا ميتة
قلبى جوَّا دروبها تاه
مش كل مولود فيها عاش
أصلا مجاش شافها طشاش
والدنيا ضربتها طناش
فاسمع كلام اللى اتنسوا .. واتبخسوا
واترخصوا وبالشهادة اترخصوا
واترصصوا يتباعوا جملة ف المزاد

رِن الجرس وابدأ بقى
هنلاقى حد بعد البياعة يشترى
ألادونا قول ياوجع
ألاتريه زعق ونادى ع الملأ
فاصل ف عمري اللى اتسرق
وانده .. دولا مين .. ودولا مين
دولا ولادنا المطحونين الغلبانين
الشقيانين اللى أصغرهم جدع
بس زودت الطريحة المؤلمة
وناموا تحت المقصلة
مات الجدع والموتة جامدة مأصلة
فارمى بياضك ع الطريق
لملم بواقى الألم والوجع
واللى فضل منًّا

admin

See author's posts