” وبيسألونى ازاى ” للشاعرة : إيمان مصطفي _ مصر

وبيسألونى ازاى ،
ومنين بيجي الشعر ؟؟؟
م الفرح والأحزان
م القلب وجراحه!
من هجر ناس أحباب
اللى فى يوم راحوا
جرحوا وتعبوا قلوب
وياريتهم ارتاحوا!

وبيسألونى ازاى!
الشعر يضوى ضى؟
وازاى بيتنفس
والحرف نبضة حى؟
من عشقنا للحياه
من الأمل فى الجاى
من العشم ف قلوب
بالحب تتواصل
وبنبضها المكتوب
إحساس جميل واصل
من ربنا القادر
ولكل شىء حكمه
وف قسمته عادل

وبيسألونى ليه
بالشعر ناس مغرمه
وبسحره مبهوره؟!
من جمله فيه مبهمه
من لقطة فى الصوره…
من فعل ماض وآت
من دهشة الحاضر
من لحظه فيها سكات
ملامحها فى الخاطر
ياقلوب يا مكسوره
مين يجبر المسكين
غير كلمتين حلوين
ينقالوا في قصيدة
علي بحر موجه حنون
والمعني فيه صيدة
تغني الفؤاد م الجوع
وتطيب الموجوع
تفتح سكك موضوع
كان منتهي الأحلام
نفرح سنين قدام

admin

See author's posts