” بانت العورة ” للشاعر : وليد مليجى _ مصر

” بانت العورة ” للشاعر : وليد مليجى
عوافي عليكو . أخباركم ؟
بخير يعني ؟؟
أنا طيب . مازلت كبير .
باصُون حتى اللي بيبيعني .
وبارمي السر جوه البير .
وصَلني امبارح المغرب .
كلام ماسخ كتير جدا .
على لسانكم . لأشكالكم .
وديك الضلمة قام يِدَّن .
مانا نسيت اللي فات يا ديك .
وبادعي ربنا يديك .
ما تلقى ركن في الضلمة .
يجوز رب العباد يهديك .
يا ديك اهدى خلاص نَتَفوك .
ما باقي فيك ولا شَعرة .
خلاص من كل شيء عرُّوك .
وخِبْت وبانت العورة .
ما تتغروش بلمتكم .
عشان هافضل أنا سيدكم .
مانيش تابع ومِتلجَّم .
ولا عاجز ومتحجم .
أنا النجم اللي في العالي .
وهاتوا ألف مين يحكم .
هيعلن إن أنا سيدكم .
كَيَان ماشي لفين ما يروح .
بتوب طاهر وقلب وروح .
لا ليا في العَوَج ذِلة .
ولا فْ يوم كنت انا قِلَّة .
فلا تتغروا بالشلة .
دا باب الهالكين مفتوح .
أنا مش ضيف . انا الندوة .
ولا المحتاج . أنا العزوة .
وانا اللي للأدب نادِي .
بإسمي الكل بينادي .
ومالي كبير ألِف وراه .
عشان يمكن ينولني رضاه .
ولا خدام لكام واحدة .
واكون موسى لهم بعصاه .
ولا كان ليا يوم واحدة .
بترمي بَلاها ع المخاليق .
أسخرها تعيب فيهم .
ما تفهم إيه مدان وبرئ .
ولا ماما ولا بابا
يغنوا ليا بربابة
أنا بطولي في وش الكون .
بلا محاسيب ولا عصابة .
لا كان لي في الغرام غمزة .
ولا شقطة وتحت لتحت .
ولا كلمة ولا لمزة .
ماليش غير في الكلام البحت .
صراحتي مشكلة ليكم .
شجاعة قلب عاش ولا مات .
وخوف الدنيا عاش فيكم .
ولو حتى باقول سلامات .
فلِمُّوا لسانكو واتخرسوا .
عشان بينكم وبيني سنين .
جواري . مين عليها الدور ؟
عبيد . انسوني إنتم مين ؟
وسيبوا الدنيا بيكو تسير .
وشوف حالك واشوف حالي .
وانا أصلا نسيتكوا كتير .
ولا بتيجوا على بالي .
فخليكم بعيد أسلم .
عشان الفرق بيننا كبير .
لا عمري شفتكم مني .
ولا يسعدني اكون منكم .
عشان تهدوا وترتاحوا …..
ياريت تنسوا ان انا سيدكم .
ياريت تنسوا ان انا سيدكم .

admin

See author's posts