14 يونيو، 2024

كان ليه بنحلم ” للشاعرة : سميرة محمودى _ مصر

سميرة

سميرة

كان ليه بنحلم بالحياه
والنبض يرجع
للقلوب الميتة
واحنا اللي خانقين الأمل
والمحتمل
هو الاكيد
إن اللي روحه
بتندفن ما بين تجاعيد السنين
بيعيش حزين
ويكون مصيره زيينا
وسط القبور المظلمة
تايهين نمني الذكريات
تولد لنا عصر انفتاح
فننادى حي على الفلاح
فيقوم صلاح
__________

ويمد إيده يشدنا
نبدأ نمني نفسنا
نرسم علي تراب الرفات
خريطة واضحة للوطن
ونصب فيه الحب
بعد ما نجمعه
من زرع صبار الزمن
ونلم شمل المدفونين
من تحت انقاض الحروب
يادوب نحس بشقشقة
للصبح بنهاره الوليد
فنعيد ف امجاد الجدود
نلغي الحدود
وف كل شبر من التراب
نزرع شجر
نبني المداين من جديد
فيقوم عمر
_________

ويبارك الخطوة الجريئة
المفرحة
وينادي كل الاضرحة
فيقوم معاه يجي كام ولي
يظهر علي
_________
فيضم فرحه لفرحنا
يكتب لنا كام الف حكمة
تدلنا نمشي الطريق
ونعلي بنيان الوطن
لو كان تمن للمجد
عمر هاندفعه
صوت الآدان ندفع
حياتنا ونرفعه
ونلم تاني شملنا
وبصدقنا هانسمعه
ترتيلة الحب الكبير
وآيات كتيرة للوفا
والانتماء
الحب كله والولاء
ليك يا وطن
يا ارضنا
لو كل ذرة في التراب
شربت دمانا كلنا
لو كل حبة رمل
طالبة عمرنا
يا شمسنا
يا رحلة النور الإلهي للسما
لو كان عذابنا اليك تمن
و ف كل خطوة مظلمة
مايهمناش
ولاعاش عدوك ينتصر
يا سنين وداد طبعت
علي كفوف التاريخ
وشم العلا
مع نصبيان للذكري
يرفع في العزايم كلها
يا منتهى
احساسنا بالشوق والحنين
لو يوم هاتسأل
عن زمانا المغتصب
لحظة غضب
تفصل ما بين مر السكوت
والفضفضة
راح تعرف السر اللي دافن حلمنا
تحت التراب
بين التراب
فو ق التراب مليون حكاية
ونفسنة
فازاي مع الكره اللعين
راجعين بنحلم بالحياة
والنبض يرجع للقلوب الميتة