من خلف سور العالم ” للشاعرة : منى حمودة _ مصر

من خلف سور العالم المجنون
تقدر تجيب الكدر م الكواليس
مشهد درامي والبكا لمَّه
مفهوم وفجأه يبقى مش مفهوم
العقل عاجز والسؤال ..ثم …!؟
الخطة ماشيه زي ما عاوزين
ماشيين بخطة فِعلَهَا ..همَّا؟
الحرب عاقلة والسلاح غلبان
أسوأ ما فيها حكمة الإنسان
السجن يبكي قلة الحيله
إزَّاي هيفتح بابه للمسجون
وازَّاي في بطن الأرض
يتولد يوسف والحُكم برضه يبقى للسجَّان
من خلف سور العالم المجنون
محتاجه أكتب إسمي في الكشكول
من غير ما عيني تشوف الدم لون الكون
من غير ما ودني تسمع الصرخه
امنع آدان القتل من مُبْتدى صوته
وابعت لـ لاجىء تذكرة طيران
مختومه رأفه مسافره رايح جي
يمكن يآمن للي جاي في الغيب
يقطع ضلوع المهزله والشك
يفرد جناحه العدل ع الأجواء
المعجزه مش حلم في المنامات
والأسطره لـ القتل فعل إنساني
ماتردني من تاني جنين في علم الغيب
شريان يرد البصر عن شهوة التخريب
فكره في علم الحرب ع الألوان
جملة مطالب لـ البشر منها:
رغم اختلاف الهوى وجراح الهويَّه
رغم اتفاقنا ع الإله توحيد
لا يقبل الإنسان بفكرة التعذيب

admin

See author's posts