عمرو أديب يتقدم بـ4 بلاغات للنائب العام ضد محمد رمضان.. «أنا مش بلطجي»

كتبت : علياء محمد

أعلن الإعلامي عمرو أديب، الجمعة، أنه تقدم بـ4 بلاغات ضد الفنان محمد رمضان للنائب العام، من خلال محاميه طارق جميل سعيد.

وأضاف في تصريحات خلال برنامج «الحكاية» المذاع عبر قناة mbc مصر، أنه يرى أن «هناك تعد على شخصه وغطرسة».

وتابع: «أنا مش من الشخصيات اللي بتحب تقدم بلاغات، لكن لازم الواحد ياخد حقه بالقانون، واللي هيقول عليه القانون والقضاء همتثل له».

واستطرد «أديب»: «أنا عايز حقي.. لأن أنا مش بلطجي وباخد حقي بالقانون مش بالشتيمة، وأي أموال سأحصل عليها كتعويض سأتبرع بها لصالح مستشفى أبوالريش للاطفال، وبما أننا في رمضان هحط قدهم من جيبي».

وتابع: «أنا مش عايز فلوس منه يرميها في البيسين يرميها في الهواء زي ما هو عايز، وأمام القانون والقضاء كلنا متساويين لا هو نمبر وان، ولا أنا الإعلامي الكبير، أنا مقدم البلاغات ومستني آخد حقي».

وكان الفنان محمد رمضان جدد، هجومه على الإعلامي عمرو أديب على حسابه في «فيسبوك»، من خلال فيديو من مسلسل «نسر الصعيد».

كان الإعلامي عمرو أديب، قد أعلن عبر برنامجه «الحكاية»، مقاضاة محمد رمضان، قائلًا: «لو محدش رباك أنا هربيك».

وأضاف أديب، عبر برنامجه «الحكاية» المذاع على قناة MBC مصر، أنه سوف يقوم بالتبرع بكامل قيمة التعويض لصالح مستشفى أبوالريش للأطفال.

ووجه أديب رسالة إلى محمد رمضان قائلًا: «لو محدش رباك أنا هعرف أربيك، البلد دي فيها قانون يسري على الجميع».

وأضاف أديب أن «الإنسان اللي متربي نعمة، وأنت لو مش متربي في اللي يربيك، وفي ناس حظها وحش وأنها أتعودت تأخذ الحياة بوشها، وبيحسوا أنهم مسنودين»، متابعا: «معنديش مشكلة أختلف مع حد في أي حاجة لكن لما نوصل لقلة الرباية يبقي القانون هو اللي يحكم».

وتابع مقدم برنامج الحكاية: «النهاردة طلبت من المحامي الخاص بي رفع قضية على الفنان محمد رمضان، وأي فلوس هخدها من محمد رمضان هوديهم لمستشفى الأطفال في أبوالريش»، مستدركا: «أنا مش من النوع اللي ياخد حقه بالتجاوز، ويا أنا يا أنت، وهنروح للقاضي هو اللي هيقول، وقلة الأدب لأ، ولو محدش رباك يا محمد يا رمضان يبقي أنا اللي هربيك».

يذكر أن الفنان محمد رمضان تعرض لهجوم شديد خلال الفترة الماضية عبر مواقع التواصل الاجتماعي وعدد من الفنانين بعدما قرر تقديم فيلم لشخصية الملك أحمس.

كما شن الاعلامي عمرو أديب هجوما عنيفا على رمضان خلال الايام الماضية بعد رد فعله على حكم ضده بدفع 6 ملايين جنيه تعويضا للطيار أشرف أبواليسر، حيث ظهر وهو يلقي أموالا في حمام السباحة، وعلق أديب: «الناس مش لاقية فلوس وإنت بترميها حتى لو مزيفة.. اللي فاكرينه موسى طلع فرعون»، في إشارة إلى اسم مسلسل رمضان الجديد «موسى».