لو مقولة الدور “بينادي على صاحبه

كتب : ماهر سعد 

اعتقد لو مقولة الدور “بينادي على صاحبه” مبنية على موقف معين اكيد حيكون القصة اللي حصلت في كواليس اختيار دور “حسن النعماني” بطل مسلسل ارابيسك لأسامة انور عكاشة !!

في برنامج “دردشة” استضافت المذيعة سهير شلبي الكاتب اسامة انور عكاشة وسألته السؤال المعتاد “محضرلنا حاجة في رمضان الجاي ؟!” قالها “اه، شغال على مسلسل حيكون بكولة عادل امام”. وفعلا عادل قراه وعجبه لكن كالعادة طلب شوية تعديلات في السيناريو و طبعا دي اكتر حاجة بتضايق اسامة انور عكاشة اللي كان رده “انا مش ترزي عشان افصل ادوار لكل ممثل، المسلسل حيتعمل زي ماهو”. فاعتذر عادل امام.

بعدها كان حصل خلاف بين اسامه انور عكاشة واسماعيل عبد الحافظ اللي المفروض كان حيخرج المسلسل واعتذر، وبعد شوية تفاصيل حقولهالك في بوست تاني اختار عكاشة جمال عبد الحميد لاخراج المسلسل، وقعدوا عشان يشوفوا مين البطل لكن المفاجأة ان اسامة كان فعلا اختار احمد زكي وبعتله السيناريو.

احمد زكي قعد شهر يقرا السيناريو ووافق فعلا بس قالهم حخلص تصوير “ناصر 56” ونبدأ على طول، هوب الوقت جرى ورمضان قرب واكتر من كده كان المسلسل حيتأجل لرمضان اللي بعده، فعمك اسامة قال لاحمد زكي معلش يا امبراطور لاعطلك ولا تعطلني، وهنا جمال عبد الحميد قال لاسامة “عندي فكرة، ما نجيب صلاح السعدني ؟!”” اسامة قال لا انا لقيت البطل خلاص.

راح المسلسل لمحمود عبد العزيز، ووافق وكان رايح يمضي العقد لكن الموضوع اتسرب للصحافة وبدأ يكتب مانشيتات من نوعية على طريقة رأفت الهجان، محمود عبد العزيز بديلا لعادل امام للمرة التانية، فعمنا محمود عمل بمبدأ “يا نحلة لا تقرصيني ولا عايز منك عسل” وقالهم سوري انا بره الليلة.

جمال كرر كلامه لاسامة “يا استاذ ما صلاح السعدني موجود نجيبه !!!”، اسامة قال لا انا خلاص لقيت النعماني، وكلموا “يحيى الفخراني” اللي قالهم والله كان نفسي بس انا بعمل مسلسل اسمه “لا” ودي قصة كان عبد الحليم حيعملها فيلم قبل وفاته وعايز اركز عشان الموضوع مش هزار.

ونرجع من اول السطر تاني عشان جمال يكرر اقتراحه لاسامة وهو متوقع الاجابة “يا استاذ السعدني صلاح نجيب طيب” اسامة كالعادة قاله لأ خلاص انا لقيت البطل المناسب، علينا وعلى كبير الليلة عمك نور الشريف.

واتعرض العمل على نور اللي برضه عجبه بس قالهم للاسف انا بعمل “عمر بن عبد العزيز” وشغل ديكورات ولغة عربية فصحى وكلام كبير والموضوع حيكون صعب، معلش المرة الجاية ان شاء الله !!

المرة بقى دي جمال سأل اسامة بتصميم “يا استاذ انت روحت للناس كلها وكل ما اقولك صلاح السعدني تقولي لا ليه هو معيوب لا سمح الله ؟!”

اسامة قاله “لأ .. بس دماغه ناشفة وحيتعبنا في الشغل وانا خلقي ضيق انت عارفني” والحقيقة جمال كان عارف كويس هو بيختار مين لانه كان صديق صلاح وبيحضر جلسات اخوه محمود السعدني فطمنه وقاله “ما تقلقش سيب الموضوع ده عليا انا معايا مفاتيح صلاح وحعرف اتعامل معاه”.

طبعا اسامة كان بيثق في جمال وكمان ضغط ان العمل لحد دلوقتي من غير بطل وافق اسامة وسبحان الله، ما كانش يعرف ان الدور حيطلع بالروعة والسلاسة دول لدرجة ان الناس تسمي المسلسل بإسم “حسن ارابيسك” على اسم بطله اللي كان كاتب المسلسل حاطه اخر اختيار ومش مرحب عليه.

admin

See author's posts