الإعلامية سونى أبو العلا تقدم عدة نصائح لتناول البطيخ المساخ

كتبت : سحر جلال

تقدم الإعلامية سونى أبو العلا عدة نصائح حينما تشترى بطيخة ب 75 جنية وتطلع ماسخة مش مسكره تعالى أقولك تعملى ايه مش هنقعد نعيط جنبها ومن اهم نصائح

** أولا : هتجيبى البطيخة وتقطعيها وتحطيها فى طبق وترشى عليها سكر حوالى ربع كوب غطيها ودخليها الثلاجة ساعة بعد كده هطلعيها هتبقى مسكره وزى العسل زى ما بقولك كده السكر هيدوب والبطيخة هتشربه.

** تانيا : قطعى البطيخ وشيلى البذر وحطيه فى الفريزر ساعة يتجمد شويه بعد كده حطيه فى الخلاط مع سكر واعمليه عصير تحفة بجد.

** ثالثا : قطعى البطيخ وشيلى البذر واضربيه فى الخلاط وحطيه فى حلة وضيفى سكر حسب الرغبة وحطى نشا لكل لتر عصير بطيخ ٤ ملاعق كبار نشا وارفعيهم على النار مع التقليب ضيفى فانيليا وصبى فى الأطباق هيبقى عندك مهلبية بطيخ لذيذة.

** رابعا : قطعى البطيخ وشيلى البذر واضربيه فى الخلاط وصفيه ودوبى معاه جيلاتين بودر لكل لتر ٤ ملاعق كبار جيلاتين وضيفى سكر وارفعيه على النار وقلبى وصبيه فى كاسات أو اطباق هيبقى معاكى جيلى بطيخ يا جمالو.

** خامسا : قطعى البطيخ وشيلى البذر وقطعى قشر البطيخ هتشيلى الطبقة الخارجية الخضرا وتاخدى الطبقة البيضة قطعيها مكعبات فى حلة حطى البطيخ والطبقة البيضة وعليهم سكر لكل كيلو بطيخ نص كيلو سكر وارفعيهم على النار لحد ما الميه تتبخر ضيفى نص عصير ليمونة أو ربع ملعقة ملح ليمون وتقلبى لما المربى تستوى حطيها فى برطمانات ولما تبرد تدخل الثلاجة يبقى معاكى مربة بطيخ قمر.

** سادسا:  قطعى البطيخ وشيلى البذر وحطيه فى الفريزر ساعة بعد كده حطيه فى الكبة وضيفى سكر وكريم شانتيه لكل نص كيلو بطيخ كوب سكر و٣ ظرف كريم شانتيه وعصير ليمونة واضربيهم كويس وممكن تضيفى لون احمر حطيه فى علبة ودخليه الفريزر ٦ ساعات هيبقى معاكى ايس كريم البطيخ لذيذ جدال.

admin

See author's posts