25 يوليو، 2024

علبةألوان ” للشاعرة : نجلاء عزت _ مصر

نجلاء عزت

هألون علبة الألوان
وهاتنفس وبالمجان
وهاضحك تاني في وشوشكم
وأنا ف قلبي جبال أحزان
ولا تهتموا لحكايتي
راح اكتم دمعتي وأهتي
وهاعكس صورتي في مريتي
وابان فرحان
أنا الابن اللي بار بيكم
وبار حقه في أراضيكم
ومهما غلبت أراضيكم
مبتحصلش غير حرمان
واكحل عيني بترابك
فترميني على بابك
وتدي الشهد لاحبابك
وابات عطشان
وألواني بقت باهتة
لا باملك دمعة ولا ضحكة
وهامشي لآخر السكة
عشان مجبور أكون إنسان
لضمت خيوطي في سماكي
وبالخير إيدي سبقاكي
منولتش يوم أنا رضاكي
ولا ف أرضك لقيتلي أمان
يا قاسية بس على ناسك
ودايسة قلوبنا بمداسك
هرب من أرضك الناسك
بقى الواطي عظيم الشان
محاربانا في رغيف العيش
ونازلة في الفقير تلطيش
عملتي سياد بقوت حرافيش
وبتحسبينا ع الاحسان
وهجّرتينا من سينا
وضاع بيتنا واراضينا
ودايرة تشحتي علينا
من الحافي اللي بقى سلطان
ونيلك راح لاثيوببا
وشاربة دمنا سوبيا
مرار طافح حياة كوبيا
وفضيت علبة الألوان